死過翻生……雪櫃

上星期五晚回家打開雪櫃，見汽水、雪糕在冒汗，心知不妙，摸摸出風口，氣若游絲，應該是摩打壞了。
把插頭重新再插，妄想它會起死回生，當然失敗。翌早，急急把雪糕拿到娘家，至於肉類、叮叮食物全部棄掉。好心痛！！！
在網上找到一個上門維修的電話：
May：「請問係咪幫人修理雪櫃？」
師傅甲：「你講吓點壞法？」
May：「風口唔凍，無製冷聲！(雪櫃原本每隔一陣子會發出輕聲開動摩打聲音)」
師傅甲：「拿！我估九成九，唔係 100% 呀吓，係摩打壞咗，情況應該發生咗幾日，吹風係逐漸微弱，最後完全無風。」
May：「全中呀師傅，整唔整得番？」
師傅甲：「我上黎睇換埋個摩打，起碼一千，你去買過個啦，二千幾蚊之嘛。」
May：「……(心諗)咁唔環保㗎！」
伴著我們入伙的雪櫃，六年就打柴？！
走到住所附近的水電舖，見師傅乙在為冷氣機燒焊，看他樣子，不是好相與之輩，都嘗試問問。對方冷冷言：「我最近好忙，唔得閒整噃！」
心灰意冷，已走去電器舖看新雪櫃，盤算買一個三門的。
見街口貼上一個維修師傅丙電話，又把它抄下，最後機會再問一次，肯不肯上來看看。
回家途中，見有收買佬，問他收雪櫃幾多錢，他說，如果不是生鏽的，$60 左右，「我而家上黎搬好無？」嘩，未有醫生把過脈便「certify」，我唔甘心囉。
致電師傅丙，他說可今天過來看，檢查不收費。今時今日還有如此服務真難得，雪櫃乃「惠而浦」，由原廠師傅上來看看，已要收 $300！
師傅丙上來看，說製冷摩打壞了，問 $500 整不整，維修後還有三個月保養。我問他整好後可用多久，如果只是幾個月貨仔便0徒氣啦，他回答：「都用到幾年，反正你個雪櫃咁新淨。」 見他又拆又裝又扭螺絲，辛苦個多小時，搞掂！
好感動，雪櫃又回復生氣。開心的還找到這個好師傅，吾等對家電維修一竅不通，壞了便扔去的不環保行為，應該大大減少。